30/10/2009

播放本新聞相關短片

拉哥倫一個頂九個畢頓

法拉利一年請拉哥倫嘅人工，可以請九個新鮮熱辣嘅F1總冠軍畢頓！近日有傳媒大爆F1車手人工內幕，20位車手09年總薪酬高達1.348億美元（約10.5億港元），其中法拉利「冰人」拉哥倫以年薪4,500萬美元成為賺錢天王！而「黑帝」咸美頓以1,800萬美元排第二，阿倫素就以1,500萬排第三。

咁今季紅到爆嘅畢頓呢？佢今季季前受到本田車隊退出影響，為咗留喺F1，甘願減薪至500萬美元跟隨「魔術手工程師」羅斯布朗，仲為布朗GP車隊贏得車手及車隊總冠軍，不過，其實佢嘅人工只及拉哥倫嘅九分之一咋！