bma甲組聯賽今晚移師九龍灣公園舉行，由愉園主場迎戰晨曦，愉園主力星散後今非昔比，預料難敵人強馬壯嘅晨曦，不過晨曦對今仗仍高度重視，兩位班主周文亮及周文舜賽前親赴操練場地打氣，叮囑球員切莫輕敵。
「愉園對晨曦」早幾年都係爭標戲碼，不過愉園今季搞青春班，實力大減，近期在聯賽及銀牌已連輸三仗，失九球未入一球，反觀晨曦保留上季聯賽盃冠軍大部分班底，人腳遠勝愉園，雖有日本外援山本朝陽停賽，但賓曹復出領軍，挾上仗新勝傑志餘勇，有力爭取連捷。
周氏兄弟督操訓話
晨曦贏面甚高，但該隊仍視今場為硬仗，會長「大B哥」周文亮，同領隊周文舜昨親赴何文田球場督操，並向球員訓示，「大B哥」話：「雖然愉園人腳大變，但我哋晨曦都換咗唔少球員，所以絕對唔可以睇輕對手，一於當五五波咁打！」
晨曦今季首次到訪九龍灣公園，原來好多球員都唔識路，高尼路仲以為係隔籬嘅「九龍灣運動場」，而九龍灣公園場地狹窄，對喜歡「上腳」嘅晨曦球員亦頗為不利，因此教練甄力健特別告誡球員，今場比賽絕對唔會輕鬆。
今日賽程
bma甲組聯賽
8:00pm 愉園（9）Vs 晨曦（7）
地點：九龍灣公園
票價：$60、$20（特惠票）
註：（）內為聯賽排名