首次在台灣舉行嘅ＮＢＡ季前賽，今晚將會在台北小巨蛋開打，由上季西岸亞軍金塊惡鬥溜馬。金塊上季成績突出，所以休季期亦冇大變動，以原班人馬挑戰總冠軍寶座；溜馬則繼續以年輕陣容應付今季賽事，格蘭加、鄧利維及ＴＪ科特合組「鐵三角」，務求爭入季後賽。 （無綫明珠台今晚８時直播）

安東尼比立斯孭飛

ＮＢＡ今季首次在台灣舉行季前賽，令台北繼北京、廣州、澳門、上海、東京及橫濱後，成為第七個舉辦ＮＢＡ季前賽嘅亞洲城市。ＮＢＡ對今次台灣賽特別重視，專程花七萬美元，從美國運來球場專用地板，又裝上ＬＥＤ計分螢幕及球員皮製座椅等，務求將環境營造到與真正嘅ＮＢＡ一模一樣，屆時還有啦啦隊表演呢！

名氣較大嘅金塊，今季繼續以安東尼、比立斯及連尼等孭飛，因上季成功闖入西岸決賽，表現大獲好評，所以今夏亦冇作大變動，只係與安東尼卡達等後備續約。至於溜馬方面，上季未能打入季後賽，主要因為球隊缺乏經驗，但格蘭加近年進步不少，上季更入選明星賽，所以球迷今日一定要留意呢位射手。兩軍打完今日賽事後，將會飛到北京，預備十一日舉行嘅北京賽。