繼奧尼爾、高比拜仁及傑特之後，「蜂王」CP3基斯保羅亦步各位「前輩」後塵，今周殺入中國，分別到天津及廣州宣傳。CP3昨難得去到五羊城，阿Bob當然要搵番呢位老友作深情訪問，今次佢親口同我講，早前有傳媒話佢會離開黃蜂只屬「流料」，佢已鐵定留隊繼續做「蜂王」！

繼上年CP3京奧前訪問澳門後，阿Bob已係第二次見呢位新一代控衞，唔知係咪上次隨粒粒皆星嘅夢八訪澳，所以CP3比較沉默，但今次就健談得多。

黃蜂上季成績倒退，CP3話主要因為傷患問題嚴重，好似主力贊特拿要長抖，人腳唔齊自然打唔出應有水準，但球隊今季一定要大翻身。不過，贊特拿已經被交換至山貓，以換取奧卡科，CP3認為今次交易對兩者都有好處，雖然贊特拿係佢好兄弟，但奧卡科係一個技術不俗嘅中鋒，相信會為球隊帶來新氣象。