上季先成為火箭球迷新寵兒，但今夏已改投湖人嘅「惡霸」阿堤斯同傑特應匹克體育用品有限公司邀請訪港！阿堤斯向來作風惹火，但原來球場外就親民搞笑，尋日接受本報訪問時不斷搞爛Gag，仲大爆前火箭隊友姚明係大話精，因為小巨人仲拖欠佢一張中文唱片，所以佢託小記見到姚明時幫佢追債，場面搞笑！

阿堤斯喺NBA打滾十年，最令人難忘嘅「戰績」梗係一連串球場暴力事件，更創下因為毆打球迷而被罰停賽七十三場，難怪上季佢加盟火箭前，連姚明都戲言佢加盟後要「停手」，結果換來阿堤斯隔空罵戰。

喺球場上Cool爆嘅阿堤斯嚟到香港大Sell親民。	放大圖片	放大圖片

姚明氹食「老鼠宴」

不過二人及後成為莫逆之交，經常互通電話，而阿堤斯亦承認全因「小巨人」，先可以喺亞洲咁受歡迎：「我在瀋陽出席活動時，竟聚集咗近三千球迷等我，我心諗仲以為係韋史密夫（Will Smith）嚟咗添。同姚明做隊友，確實增加咗我喺中國嘅名氣，所以我曾經同佢講：『我在中國代言任何產品，報酬你可分一半！』不過，姚明當然冇要啦。」

此外，阿堤斯亦經常向姚明請教中國文化，因為曾經出碟嘅阿堤斯，將於今年與內地歌手合作推出唱片，其中更有一首歌歌詞含有中文。阿堤斯表示常見姚明聽歌，所以曾要佢介紹中文歌畀自己：「我仲記得姚明畀咗一首由女生唱嘅R&B我聽，雖然我唔知佢唱乜，但肯定係好音樂。其後姚明話會錄隻唱片畀我，但已經過咗三個月，都仲未收到張唱片，如果你見到佢，一定要幫我追數。」另外，阿堤斯亦透露曾跟姚明到中國餐館食飯，不過姚明竟介紹佢食老鼠，結果佢梗係唔食啦。

縱然阿堤斯於去季季後賽與高比拜仁有過衝突，但佢表示當時各為其主，相信高比仔都會明白，而且佢亦訂下目標，希望可在未來十年豪取五枚冠軍指環後退休，果然大口氣！

阿堤斯今日將會到中國作私人遊覽，傑特飛返美國。