「Red Bull X-Fighters」電單車飛行世界巡迴賽總共有五個分站，計有墨西哥、加拿大、美國、西班牙及英國，除咗英國係於倫敦一個廢置嘅發電站進行之外，其餘四站都喺鬥牛場或者畜牧場改裝嘅場地舉行，電單車手化身為古代牛仔一樣。

扣人心弦嘩聲四起

電單車飛行好睇之處，當然係車手於空中進行一連串匪夷所思嘅動作，例如成架電單車連人翻騰、交叉腳、懸掛、扮超人等，你永遠估唔到車手會做乜嘢動作，你亦永遠唔會知道，佢會唔會發生意外，嗰種扣人心弦嘅氣氛，喺現場睇真係逼到你抖唔到氣。當車手清脆利落着地，你會不自覺大嗌一聲「Yes」或者「嘩」，為佢同自己鬆一口氣。

現時嘅電單車飛行世界巡迴賽更加入牛仔元素，例如西班牙分站喺馬德里鬥牛場舉行，開場時一班牛仔衝入場，與電單車追逐，十足十奔牛節嘅情景，而資格賽同淘汰賽之間又有馬匹跳Tango，以及Live Band表演，完完全全係一個大Show，場內個個都熱血沸騰。

「Red Bull X-Fighters」電單車飛行世界巡迴賽八強至冠軍戰以淘汰賽形式進行，兩位車手單對單，決賽兩位車手則有兩分鐘表演時間。五個分站冠軍有一百分，亞軍八十分，季軍則有六十五分，累積得分最高嘅成為總冠軍。

現時已進行四站，最後英國站會於八月廿二日舉行。