被傳媒冠以「翻版楊怡」稱號嘅Hidy，擁有古銅色肌膚同埋健康形象，所以大受運動品牌同埋健康產品商歡迎。學生年代就讀體壇名校賽馬會體藝中學嘅佢，即使入行後仍然Keep住做運動：「我好鍾意戶外活動㗎，以前讀書嘅時候就係長跑校隊成員。畢業之後我就開始試玩潛水，初時都覺得幾難㗎，又要學理論，又要接受訓練。不過，全靠我有個專業教練Willian，先可以咁快上手，依家我已經考到兩個潛水牌照嘞！」

與趙碩之結片緣。	任Model時散發出不同味道。	好High唷！

「屈機型男」教路

Hidy所講嘅專業教練，原來就係喺今屆甲一籃球常規賽，協助飛鷹歷史性攞到亞軍嘅大前鋒劉健明。呢位擁有四十一吋胸肌、混血兒臉孔嘅「屈機型男」（勁嘅最上級詞），單睇外形已經令學生特別留心聽教，再加上佢有多年教潛水經驗，實在會令事半功倍。不過，謙虛嘅Willian就將功勞還番畀學生：「Hidy本身已經成日做運動，所以學起上嚟唔會『姐手姐腳』。同埋佢好聰明，好多嘢一學就識，所以先會學得咁快。」呢對型男索女嘅「潛水師徒」果然夠晒默契，難怪有唔少廣告都搵佢哋兩個一齊拍啦！

談及潛水嘅種種經歷，Hidy就話好享受水入面嘅忘憂世界：「每次潛水全身嘅器材都好重好重，但落水後就好似入咗無重狀態咁漂吓漂吓，真係乜嘢煩惱都無晒。仲有嘅係，喺水底會見到好多《海底奇兵》嘅MO仔（小丑魚）、海星同埋珊瑚，佢哋都好靚、好得意㗎！好似去咗仙境咁！」

圖、文：司徒子文