唔知道喺大家心目中，乜嘢人先會去打欖球呢？有人話「Hong Kong Sevens」啲門票鬼咁貴，一定係中產人士啦！又有人話香港代表隊幾乎九成球員都係紅鬚綠眼，一定係洋人啦！但原來喺中國大陸，打欖球嘅真係乜人都有，就以啱啱遠赴馬來西亞出戰「滙豐亞洲五國欖球賽」嘅中國隊十八人大軍為例，有男飛人、教師、解放軍，亦有玩開推鉛球、獨木舟省隊代表，各行各業乜都齊，堪稱最強雜牌軍！

首先筆者想表明，用「雜牌軍」嚟形容呢支國家隊係絕無貶意！皆因喺中國欖球發展史上，由九○年先有第一支欖球隊出現，到依家只係用咗唔夠二十年，就已經能夠挑戰亞洲列強，實在有賴一班嚟自唔同界別嘅「二線兵」！

中國欖球隊成員目標一致，期望更上一層樓。	中國隊最終雖未能升班，但來日方長。	放大圖片

就以副隊長陳健為例，本來係河北省獨木舟代表嘅佢，因為水平問題而入唔到國家隊，所以決定放手一博「轉行」到欖球發展，結果一拍即合搵到自己嘅「Mr. Right」，依家仲兼任國家隊副教練添，幾巴閉！

隊長胡明「膊頭有花」

嚟自中國農業大學嘅三位老師余國、袁峰同埋朱培厚，想當年都係短跑好手，閒閒哋十秒幾就跑晒一百米，但係能夠做到呢個時間嘅人，喺內地可以話通街都係，最後三人都決定轉投欖球界，最終發揚光大。

不過，講到球隊嘅「大股東」，就梗係解放軍啦！國家隊基本上有七成隊員都係軍人，出外比賽完全唔驚畀人打劫。當中擔任隊長嘅胡明更係軍中「膊頭有花」人士，壓到場之餘，球隊上上下下仲聽晒佢話添。

司徒子文馬來西亞直擊