萬眾期待，ＮＢＡ總決賽聽朝正式喺洛杉磯開打！東岸代表魔術喺分岸決賽爆冷淘汰騎士，製造意想不到嘅總決賽戲碼，再一次告訴世人，籃球「笨」唔係靠一個人打嘅！如今遇上同樣靠晒高比拜仁嘅湖人隊，魔術肯定重施故技之餘，再加入新元素，四招魔法勢宰湖人，向球會史上首個總冠軍進發！
第1招： 三分冷箭
事實證明，強如塞爾特人及騎士都頂唔住魔術嘅三分球，全因魔術實在有太多炮台，陶告魯、劉易斯、比杜斯及艾斯頓射得之餘，最重要係各人都非十八廿二，經驗老到自然擁有強勁心理素質，難怪陶告魯及劉易斯在今季季後賽中，多番射入關鍵三分球。再者，湖人喺常規賽早已嘗盡魔術三分球嘅厲害，今季兩次對碰，魔術每場都射入十二個三分球，絕對係打倒湖人嘅重要武器。
第2招：內線爆破
雖然杜域侯活冇七呎身高，但「超人」嘅強橫身體素質及驚人彈跳力，早已彌補身高稍遜嘅弱點。今季侯活喺季後賽平均攻入21.7分、15.4個籃板球及2.2個封阻，堪稱內線霸主，事實上，佢亦係今季季後賽「籃板王」及常規賽最佳防守球員，就算強如加素，想爆入內線都大有難度。此外，預期防守杜域侯活嘅都會係明顯未成氣候嘅拜林，呢個對碰肯定以侯活佔優，就算換轉係加素，一樣唔及「超人」硬淨，所以湖人除咗身高之外，內線根本佔唔上優勢。
第3招：凍結高比
魔術淘汰騎士其中一個亮點，就係「防守專家」比杜斯嘅出色發揮，雖然佢每次都係後備出場，但往往能將「大帝」勒邦占士威力減到最低，絕對係魔術搞掂騎士嘅功臣之一。勒邦占士喺東岸決賽對戰魔術時，曾喺第二戰犯上六次失誤，而第四戰更有八次之多，全賴比杜斯緊密防守所賜。因此，估計魔術面對湖人時，都會再派比杜斯凍結得分泉源高比拜仁，若然戰術成功，湖人威力至少減半。
第4招：奇兵復出
正所謂人生有幾多個十年？早前因為肩膊受傷而提早收咧嘅魔術正選控衞尼爾遜，眼見球隊入到總決賽，都決定收回收咧成命，復出爭冠！尼爾遜今季兩對湖人，首戰攻入27分，而第二仗就攻入28分，結果兩戰都成為贏波功臣，堪稱湖人剋星。因為尼爾遜早前已經復操，加上佢非常渴望在總決賽上陣，所以預計魔術會多一位猛將，令湖人更加防不勝防。