本文重點
傳統勁旅湖人今季再度打入總決賽，亦係高比拜仁十三個球季中第六次登上呢個王者舞台！不過，今次絕對係佢生涯中最重要一次，皆因一直以嚟，高比仔都證明唔到冇奧尼爾幫手嘅情況下攞到總冠軍，適逢最大敵人騎士及塞爾特人已經出局，高比拜仁實在再冇藉口輸波。
高比拜仁喺○○至○二年助湖人三奪冠軍，但當時最大功臣始終係中鋒奧尼爾，及後兩人「分手」，湖人七年來未獲總冠軍，難免被人質疑當時「保高比、棄奧尼爾」嘅決定。近日有記者舊事重提，問高比仔當年係咪一手趕走奧尼爾，結果高比即時大發脾氣，明顯被篤中死穴。但只要今季擊敗魔術，任何非議都可以一掃而空。
侯活有同一條刺
其實魔術都有球員受到奧尼爾影響，佢就係杜域侯活，「超人」近年不斷被奧尼爾批評，指佢任何事情上都抄足自己，好似入樽姿勢或者「超人」花名等。不過杜域侯活日前就表明有樣嘢一定唔會抄奧尼爾，就係背叛魔術，佢表示會効力魔術直至退休為止。