今季NBA總決賽要到香港時間周五早上先開打，但無論如何，東岸冠軍魔術肯定未打先贏！魔術擊敗騎士後人氣爆燈，球隊來季季票隨即大賣，且季後賽表現出色令其獲奧蘭多政商兩界全力支持，再加上豐厚嘅電視轉播收益，料魔術肯定可以改善近年虧蝕嚴重嘅情況。
唔好睇魔術今季咁風光，其實呢班波近年一直飽受經濟危機！基於近年成績唔算突出，且未如湖人或騎士般擁有魅力球星，所以據悉魔術近年來，平均每季虧蝕一千至一千五百萬美元，再加上金融海嘯席捲全球，難怪魔術曾向聯盟借錢應急。
入總決賽解財困
不過，魔術今季大突破，十四年後重返總決賽，成績飆升自然成為票房保證，據《美國體育在線》指出，魔術今季季後賽人氣旺盛，期間已經賣出超過二千七百張來季季票，較近年同期時間有極大增長，此外，當魔術淘汰騎士後，更加單日賣出四百張季票以上，銷售情況非常理想。
收視季票升幅勁
事實上，門票收益係一支球隊最主要收入，能夠確保季票賣出，無疑會對一支長期虧蝕嘅球隊帶來振奮。另方面，魔術為解決經濟危機，已計劃於一○年至一一年球季搬遷至新場館，因今季能夠打入總決賽，亦令球隊獲得奧蘭多政商兩界全力支持。再者，今季NBA季後賽收視率大增，TNT直播東岸決賽較去年同期增長30%，而ESPN直播西岸決賽就較去年同期增長32%，所以就算魔術攞唔到總冠軍，經濟收益已經令佢哋成為大贏家。