本文重點
「大帝」勒邦占士出道以嚟被譽為「佐敦二世」，估唔到占士嘅NBA路途同「波神」似到十足十，加入NBA六年以來始終未能獲得一枚冠軍指環！不過「大帝」可以放心，因為佐敦都係打咗七年先初嘗總冠軍滋味。
今年係「大帝」角逐NBA嘅第六個年頭，由於佢獲選為常規賽MVP之餘，亦帶領騎士取得常規賽冠軍，所以一眾球迷都估計佢今季可以攞埋首枚冠軍指環。之不過佢條命或者真係太似「波神」，米高佐敦於其職業生涯第六個球季，於東岸決賽輸畀活塞出局，但經過呢次教訓後，佐敦生涯第七季就領公牛奪得總冠軍，並於往後取得三連霸，所以占士都唔使太失望。
想做波神戒驕躁
不過點都好啦，雖然占士球場內嘅表現無懈可擊，但場外佢嘅高傲性格，經常「得罪人多、稱呼人少」，就好似今季被淘汰之後，竟然唔同魔術球員握手，真係好冇禮貌。事實上，占士嘅無禮行為經常成為眾矢之的。要真正成為新一代「波神」，必須連品格都有所改善，先配得上呢個名銜囉！