本文重點
尋日高比拜仁再度打出完美表現，協助湖人作客以一一九比九十二大勝金塊，以總場數四比二淘汰對手！今年係湖人創會六十年來第三十次成為西岸冠軍，並向第十五個總冠軍（Finals）進發，以湖人嘅絕佳狀態，相信唔難完成任務！
高比仔尋日可謂打出完美一戰，攻入35分之餘，仲有６個籃板球及10次助攻，成為米高佐敦後，史上第二位有四季季後賽以上，每季至少入500分嘅球員！此外，今場高比仔全場提點隊友，大有領袖風範成為贏波關鍵。加素亦交出「雙雙」20分及12個籃板球，最終帶領湖人大勝金塊，連續兩季殺入總決賽，同時亦係高比仔職業生涯第六回。
西岸30冠賀「60大壽」
能夠再次殺入總決賽，對湖人真係別具意義，事關今年係湖人成立六十周年，第三十次稱霸西岸，若果之後喺總決賽擊敗對手，更加會係第十五次取得總冠軍。難怪高比拜仁賽後豪言：「上季我哋殺入總決賽，可惜未能奪標，但今季一定可以做到。」
至於輸波嘅金塊，最傷心肯定係攞到25分嘅安東尼，事關尋日係佢廿五歲生日，難怪佢賽後都話呢份係最差嘅生日禮物。不過教練卡爾就話輸得心服口服，大讚湖人有冠軍相。湖人提早出線後，將會養精蓄銳，喺總決賽等待魔術或騎士嘅勝方，總決賽將於香港時間周五展開。