本文重點
正如金塊教練卡爾所講，冇人會估到金塊今年有咁好成績，六年來首度突破季後賽首圈之餘，更淘汰小牛殺入西岸決賽，贏盡口碑！最重要係金塊多名主力仍然非常年輕，所以金塊嘅未來非常樂觀。
比立斯可玩多幾年
雖然金塊嘅夢幻旅程告一段落，但多支出局球隊中，最有希望就係佢哋。金塊多名主力都非常後生，安東尼廿五歲、連尼廿六歲、JR史密夫廿三歲，另外丹迪鍾斯都係得廿八歲，仲有大把進步空間。年紀最老嘅主將就要數到比立斯，佢今年卅二歲，但比立斯嘅打法向來唔係橫衝直撞，加上今年佢喺金塊大放異彩，估計打多兩三季都唔成問題。
再者，金塊今年有多名副選抬頭，好似「鳥人」基斯安達臣及立陶宛國手基利沙等，兩人薪酬都唔算高，相信下季會繼續留隊。唯一有離隊可能係簡安馬田，呢位大前鋒年薪實在太高，但效能並非太好，所以換走佢亦唔出奇。