勒邦占士壓哨三分拯救騎士！東岸決賽第二回合，戰情可算係首戰翻版，騎士一度領先23分之下，尾段竟被魔術逆轉，幸好球隊擁有ＭＶＰ勒邦占士，佢喺最後一秒接波後即投入壓哨三分波，助騎士以96：95絕殺魔術，總成績追成一比一，驚濤駭浪地保住主場優勢。
雖然騎士獲得最後勝利，但下半場嘅表現絕對唔收貨，騎士一開賽已拉開領先優勢，去到第二節更領先魔術23分之多，可惜及後一直被魔術追分，客隊於第四節反先，戰情同首戰如出一轍。
完場前走步險壞事
賽事剩餘30秒時，「大帝」竟然喺關鍵時刻走步，讓魔術重新組織攻勢，及後陶告魯單挑柏夫洛域跳射入籃，魔術領先騎士兩分，時間僅剩餘一秒。魔術本以為勝利在望，但勢估唔到占士喺最後關頭接應莫威廉士傳球射入壓哨三分，最終騎士險勝一分，執番場主場勝仗。
杜域侯活僅入十分
占士賽後表示：「我們實在無法承受落後○比二局面，所以我需要站出來，這是一次偉大投射！」占士今場攻入35分及５個助攻，但同時亦有６次失誤，不過射入絕殺三分，幾多失誤都冇所謂囉。魔術方面，劉易斯及陶告魯分別攻入23及21分，而杜域侯活則僅得10分進帳。明日兩軍將會主客互調，魔術於主場出戰騎士，雖然魔術近兩戰逼到騎士喘不過氣，但騎士十場季後賽僅得一次敗績，受讓絕對捧得過。