本文重點
正如一眾火箭球迷所講「No Yao,No McGrady,No Problem!」兵微將寡嘅火箭再一次創造奇迹，西岸四強第六回合憑身高僅得六呎九吋嘅史高拉統治籃底貢獻「雙雙」，加上布魯克斯交出全隊最高26分，結果火箭意外地以95比80擊敗湖人，總成績追成三比三，兩軍將於下周一第七場生死戰決勝負。
剛於第五戰慘敗四十分嘅火箭，估唔到咁快可以恢復過來，雖然姚明、麥基迪及莫湯保三大球星都只能文裝一道做應援團，但今場火箭卻有極佳開局，史高拉連續強攻籃底下打出一波17比１攻勢，直到賽事進行五分多鐘後，湖人先第二次攞分，所以火箭首節已拉開十二分領先優勢。
魔術塞爾特人亦打第七戰
火箭其後繼續領先，但第三節差啲畀湖人逆轉，湖人打出一波９比０攻勢，及後更藉高比嘅罰球，縮窄至兩分之差！幸好火箭回氣後，三節過後重新拉開至九分優勢，末節蘭特利及布魯克斯雙雙成為主角，兩人連番得分令湖人逆轉無望，最終火箭爆冷贏95比80，追成三比三後，下場將要作客洛杉磯打生死戰。
近仗都畀加素恰死嘅史高拉，今場吐氣揚眉奪得「雙雙」24分及12個籃板球，而另一大前鋒蘭特利亦有15分進帳，相反加素今回僅得14分，而拜林更得分捧蛋，內線成為今場勝負關鍵。至於高比仔雖然攻入全場最高32分，但其餘隊友交唔到貨，最終都要打第七回。湖人嘅積遜教練賽後表示，上次主場可以炒火箭四十分，生死戰一樣做得到。
另方面，同日魔術亦憑中鋒杜域侯活打出恐怖「雙20+」23分及22個籃板球，協助球隊喺主場以83比75擊敗塞爾特人，追成三比三，兩軍同樣需要打第七場生死戰。