見慣大場面
今年22歲嘅Lisa，做咗登台歌手原來都有三四年，佢曾經喺好幾個省巿，跟住歌舞團四出登台演出，過時過節就會去體育館作大型嘅表演，幾萬觀眾閒閒哋，平時就會去夜總會演出，每晚少極都會有一千幾百人，所以見慣大場面。
Lisa話：「自己讀書時就好喜歡唱歌跳舞，所以每逢有啲乜嘢大型活動，老師都會搵我負責演出，為咗唔好影衰學校，所以學校每次都會派老師嚟訓練我，令我集各家所長，小小年紀就可以唱唔同類型嘅歌曲，流行曲同女高音更係我嘅強項。」
之後點解會做咗呢行呢？Lisa話：「讀到高中，有年暑假我哋鄉下搞咗個學生文藝團，去一個災區演出，我就係其中一分子，後來有製作公司嘅負責人睇中咗我，叫我參加佢哋嘅歌舞團，我即時就答應，記得高中最後一年，經常請假去登台。」
經常去飯局
咁你參加過大大小小嘅演出，一定有同啲大牌歌手合作過，佢哋會唔會好難相處呢？Lisa話：「我同中、港、台嘅男女歌手都有合作過，雖然唔係同台，但未出場前，大家都喺後台有講有笑，我覺得佢哋一啲都唔難相處，有啲仲好好人添！」
咁有人話做歌星成日有飯局，究竟係咪呢？Lisa話：「我哋每去一個地方演出，當地嘅主辦單位，一定會搵齊啲協辦單位、贊助商嚟食餐飯，但通常都係大家認識吓，唔會話一食完飯就要上房，但老闆同歌手日後有冇再發展，咁就唔清楚啦。」
至於另一位19歲嘅靚女Niko，佢話自己半途出家，畢業之後搵唔到嘢做，咁啱有個表哥喺歌舞團做樂師，於是介紹埋佢去做，起初做啲助理嘅工作，後來有晚臨時唔夠人用，要Niko上台客串一曲，因為表現唔錯，於是畀老闆賞識，先至做埋歌手。
靠打天才波
Niko話：「我冇學過唱歌，所以有時畀份曲譜畀我都唔識睇，但如果真係要唱，你畀我聽首歌嘅MP3幾次，我就會唱到，通常一晚唱五首嘅話，我又聽又練一日左右就可以演出，我表哥都話我係打天才波，但客人滿意，老闆開心，咪頂硬上囉！」
做咗歌手之後，有冇覺得有乜嘢唔同呢？Niko話：「我以前比較細膽，但做咗歌手之後，經常要喺好多人嘅面前演出，自信心大咗好多，而且仲多咗好多人追求我添，有啲Fans為咗討好我，仲會送花送公仔送飾物畀我，搞到我不知幾咁開心。」
如果大家都想聽吓Lisa同埋Niko嘅歌藝，大家有機會啦，只要喺今個月嚟到佢哋工作嘅夜總會，事關佢哋會喺呢個月舉辦Live演唱會，除咗今日訪問呢兩位靚女歌手會傾力演出之外，仲會有好多靚女忘情獻唱，想聽難忘醉人金曲，就千祈唔好錯過。
Niko Profile
年齡：19歲
三圍：34、25、33
興趣：演出
Lisa Profile
年齡：22歲
三圍：34、24、34
興趣：唱歌
撰文：小德 攝影：強