本文重點
魯域斯基個「飛賊」女友畀FBI拉咗，搞到小牛尋日操練之後，「基哥」即被大批記者圍住「問話」，雖然佢想家醜不外傳，封口隻字不提，但「基哥」言談間都黯然吐出一句：「我正經歷一段艱難時期！」可見佢有幾多煩惱！既然魯域斯基受感情困擾冇mood打波，小牛仲有乜本錢同金塊抗衡，相信第三回合金塊可再贏一仗。（廣東體育周日清晨5時直播）
魯域斯基女友泰萊喺「基哥」間達拉斯豪宅被捕，身為男友當然擔心啦，始終泰萊都孭住偽造身份同盜竊兩項罪名，坐監機會高唱入雲，難怪魯域斯基尋日操練時都悶悶不樂。佢喺操練後就對圍訪嘅記者表示：「我正經歷一段艱難時期，不過我唔想公開我嘅私事，所以我只會答有關籃球嘅問題，其他都無可奉告，但我亦唔會因為私人問題而影響喺場上嘅表現。」
講就容易，其實唔少傳媒都話魯域斯基尋日落晒形，明顯受到泰萊事件影響，心神恍惚下又點打好波呢，所以聽日小牛要讓4分之下，必捧氣勢如虹嘅金塊。
騎士再獵鷹領先2:0
至於尋日戰果，騎士繼續向鷹隊「施暴」，三節過後已領先30分之下，又一次提早進入垃圾時間，最終騎士大勝鷹隊105比85，總成績領先二比○。今場「大帝」勒邦占士僅上陣31分鐘就攻入27分及5個助攻，而後備上陣嘅薩比亞亦有17分進帳。鷹隊首席射手祖莊遜更喺第三節扭傷右足踝，要坐輪椅離開球場，聽朝第三回合未必趕及上陣，令人擔心。