本文重點
火箭驚濤駭浪以89比88險勝拓荒者，總成績領先三比一！第四回合「小巨人」姚明全面復甦，個人攻入21分12個籃板，同時令兩位拓荒者中鋒大受犯規次數影響，此外柏堤亞喺末節射入兩記重要三分，最終火箭贏波保住主場賽事。現時火箭形勢大好，只要聽日作客再勝一仗，就可以提前進身季後賽次圈。（周三早上10時開賽）
近年火箭打親首圈嘅第四戰都冇運行，佢哋對上一次贏波，已經要數到九八年賽季，但火箭今季終於解咒，上場畀人盯到一戙都冇嘅姚明，今場全面回勇，佢喺今季季後賽首次起手次數達雙位數，攻入21分12個籃板，亦係今季季後賽首次獲得「20+10板」嘅成績。姚明回勇下，拓荒者兩大中鋒柏斯比拿及奧登今場合共食咗9次犯規，可見「小巨人」嘅侵略性。
騎士橫掃活塞4:0
今場火箭另一關鍵人物係柏堤亞，佢喺第四節尾段兩度射入關鍵三分，保住火箭領先戰果，拓荒者最後關頭雖有費南迪斯完場前2.3秒射入三分，可惜最後時間太少，火箭險勝89比88，總成績領先三比一。背城借一嘅拓荒者聽日將會重返主場打第五戰，基於拓荒者一眾球員較為年輕，欠缺經驗下未必受得住如此壓力，加上火箭氣勢如虹，大有機會擺脫近兩季首圈出局嘅厄運。
另方面，同日「大帝」勒邦占士個人轟入36分，結果騎士以99比78再一次大勝活塞。總成績騎士橫掃對手四比○，亦成為今季首支晉級次圈嘅球隊。