本文重點
鹽湖城威力果然厲害，爵士以88比86險勝湖人，場數追成一比二！雖然爵士由迪倫威廉士射入最後一擊，但今場主角係布沙至真，呢位「夢八」大前鋒用行動話畀加素知咩叫力量型大前鋒，布沙全場強打籃底，攞到驚人嘅「雙20+」數字，係贏波第一功臣！聽日爵士再度喺主場出戰湖人，大有機會添食。（無綫明珠台及高清翡翠台周日早上9時直播）
爵士嘅鹽湖城主場向來剋住湖人，上季季後賽四強戰，爵士一度憑主場之利追成二比二，估唔到尋日劇情再現。今場最關鍵係布沙嘅驚人發揮，因湖人中鋒拜林全場受犯規數字影響，不時要坐喺後備席，所以布沙可以肆無忌憚咁強攻內線，佢今場射入廿三分之餘，最恐怖係搶得廿二個籃板球，西班牙天王加素完全唔夠打。
其實湖人本來都有機會反敗為勝，皆因迪倫威廉士射成88比86時，湖人仲有二點二秒進攻，可惜高比拜仁嘅「絕殺三分」唔入，結果被爵士追成一比二。今場高比仔表現失準，廿四射僅五中，全場只得十八分。爵士聽朝續會主場迎戰湖人，以球隊嘅高昂士氣及狀態，加上主場之利，相信再勝一場並唔出奇，受讓兩分撐爵士。
馬刺慘負小牛創低分紀錄
另方面，馬刺繼首場季後賽失準輸畀小牛後，尋日又嘗到恥辱性敗仗，作客小牛慘負67比88，創下球隊季後賽歷史上得分新低紀錄，周日凌晨再次作客達拉斯令人擔心。（有線165台周日凌晨4時直播）