會考又嚟喇，身為會考生嘅你溫晒書未呢？Kittak身邊都有幾個朋友好努力咁準備，令Kittak諗番起以前一邊會考，一邊打波嘅日子……
家長學校應多體諒
記得會考嗰年我要準備亞青（室內排球呀），平日星期一至五都要返學，朝早6點幾起身，晏晝4點放學，都已經好攰啦，又要即刻趕去練波喎，之後沖完涼食埋飯，最早都夜晚10點，日日都係咁……weekend就練體能同比賽，唔辛苦就呃你，最慘係冇時間同精神溫書。
其實學生運動員真係唔易做，可能因為體育喺香港始終唔係咁受重視啦，你日練夜練都好，冇咩人會欣賞，家長同老師大部分唔支持，覺得打波冇用，讀多啲書好過，我自己就感同身受喇，亦眼見唔少運動員因公開考試而暫停練習一年，好可惜。
Kittak因為比賽接觸到其他地方嘅學生運動員，知道佢哋有體育學校，平日主要訓練，讀書只係其次，但佢哋家人又好支持喎，因為佢哋有好多資助，而且運動勁就可以入大學，even你學業成績幾差都好，呢樣係香港暫時冇可能做到嘅。
香港對體育方面嘅資源始終有限（我可以寫嘅字數都係，哈哈），唔可以有效咁support學生運動員，不過都希望家長同學校可以多啲體諒啦！
Kittak
中學時代被譽為「學界首席沙排明星」，奪獎無數，到入咗城大應用社會學系後更積極參與運動，並擔任NIKE Girl作網上主持人，深受網友歡迎