本文重點
韋迪擺脫心魔，助熱火追平鷹隊！季後賽首戰表現極爛嘅韋迪，尋日終於回勇打出當年總決賽MVP水準，個人射入六個三分球轟入卅三分，助熱火作客以108比93擊敗鷹隊，總成績追成一比一，至於首戰同樣輸波嘅魔術，亦成功追平76人。另方面，今季新秀狀元戴歷羅斯眾望所歸下奪得常規賽最佳新秀。
首戰大敗廿六分之多嘅熱火，尋日迅速回勇，作客環境下竟早早奪得主動權，上半場壓住鷹隊嚟打，領先十三分之多。雖然鷹隊喺第三節表現略有改善，但因熱火今場嘅遠射實在太準繩，呢隻鷹最終亦慘被射死。熱火今場三分球廿六射十五中，命中率接近六成，其中「閃電俠」韋迪及「三分王」曲克各射入六個三分球，均屬贏波功臣。
另有七個助攻嘅韋迪賽後表示：「奇迹發生了，要知道我們上仗才經歷糟糕一戰，所以今場表現連我也覺得驚訝！」
魔術贏76人追和1:1
除熱火追成平手外，東岸「三哥」魔術亦以96比87擊敗76人，總成績追成一比一。今場魔術有六名正選奪得雙位得分數字，其中李爾奪得全場最高嘅廿四分，而杜域侯活六犯離場亦無損球隊贏波。
此外，効力公牛嘅戴歷羅斯以574分奪得今季常規賽最佳新秀，繼米高佐敦及白蘭特後，成為第三個公牛球員奪此殊榮。至於灰熊嘅美奧就以246分排第二。