本文重點
季後賽首戰贏得極度輕鬆嘅火箭，尋日終遇硬仗，痛定思痛嘅拓荒者今回成功盯死「神槍手」姚明，加上隊長萊爾大發神威，個人轟入四十二分，結果拓荒者以107比103險勝，總成績追成一比一。火箭更損兵折將，老將莫湯保扭傷左膝被抬離場，可能就此收咧。
首戰被姚明打得落花流水嘅拓荒者，今場吸取教訓，加強內線防守，並重點盯實「小巨人」，唔畀佢咁易起手，結果戰術奏效，姚明全場起手得六次，僅得十一分。相反主隊隊長萊爾就返晒嚟，射到唔識停，完全進入忘我境界，最終起手廿七次入十五球，全場轟入四十二分、七個籃板，但就僅得一個助攻，可見佢信心爆棚，根本冇諗過交波。
今場火箭再一次喺末節失準，最後五分鐘啞晒火被對手拋離分數，雖然布魯克斯完場前連入兩個三分，但為時已晚。火箭輸波之餘，中鋒莫湯保亦勇戰受傷，呢位四十三歲老將首節與奧登一次相撞後倒在地上，抱着左膝呻吟，最終被抬離場。初步檢驗，莫湯保係膝蓋腱撕裂，要進行磁力共振後，才知道可否繼續今季賽事。
杜域侯活膺最佳防守
另方面，常規賽獎項陸續出爐，魔術中鋒杜域侯活以542分當選最佳防守球員，大幅拋離第二位得148分嘅勒邦占士，而杜域侯活亦以廿三歲之齡，成為史上最年輕NBA最佳防守球員。