本文重點
猶他州首府鹽湖城，最令人印象深刻就係每年鹽湖均遭受大湖效應（Lake-effect snow），降雪量大增及暴風雨連連，令造訪人士刺骨，難怪唔少球隊作客去到爵士主場ESA場館，都有一種無形壓力！湖人聽朝就要挑戰「冰雪球場」，「紫金兵團」近年作客鹽湖城都冇乜好下場，今場仲要讓分，必捧爵士下盤。（now 671周五早上10時30分直播）
今季爵士能夠打入季後賽，都係全靠主場威力，常規賽主場成績卅三勝八負，得勝率高達八成，西岸就只有湖人及拓荒者好過佢哋，絕對非同小可。唔只咁，近年湖人屢次喺鹽湖城「浸親」，好似上季季後賽，兩軍喺西岸四強戰碰頭，劇本同今年幾似，都係湖人首兩戰贏波，但第三、四場一作客就連輸兩仗，被爵士追成二比二，甚具參考價值。
馬刺醒番可再劏牛
雖然爵士最終都係被淘汰，但主場出戰絕對唔可以睇低佢哋。再者，湖人今季唯一一次作客爵士，亦同樣輸波，而當時爵士更有「夢八」成員布沙因傷缺陣，可見湖人作客鹽湖城的確周身唔聚財，今場布沙出得番，主隊實力更完整，湖人要讓成五點五分咁多，梗係捧主隊爵士。
至於另一場西岸大戰小牛對馬刺，同樣睇好受讓四分嘅馬刺。經歷第一場遊魂輸波後，馬刺似乎已經醒晒，尤其柏加知恥近乎勇，第二仗擔起領袖角色攻入38分，足證其狀態及心態都返晒嚟。基於小牛經常僅得魯域斯基一個進攻點，只要馬刺睇通呢點守好「德國司機」，作客贏波唔出奇，始終整體實力都係馬刺較佳。（有線165台周五早上8時30分直播）