本文重點
今季NBA季後賽果然充滿變數，首日賽事狂吹冷風，四場排名較高嘅球隊僅得「一哥」騎士過關，其餘拓荒者、馬刺及衞冕冠軍塞爾特人均出師不利，爆冷輸波！火箭今季總算有好開始，憑藉「小巨人」姚明百發百中奪24分下，早早奠定贏波基礎，最終作客大勝拓荒者108比81，總場數領先一比○。
略被睇淡嘅火箭，首場作客就令專家大跌眼鏡。今場拓荒者無論派出正選中鋒韋斯達，抑或後備入替嘅奧登，都頂唔住姚明嘅猛烈攻勢，「小巨人」單喺上半場已經9射9中，加上罰球6投6中合共奪得24分，出手例無虛發，亦因此協助火箭於上半場已領先十八分之多，奠下勝利基礎。
基於火箭早已拉開比分差距，所以姚明喺下半場亦專心防守及助攻，未有再起手取分，全場比賽「小巨人」亦只係上陣24分鐘，在第四節提早進入垃圾時間之下，火箭最終大勝拓荒者108比81，總場數領先一比○。除姚明奪得24分、9個籃板球及2次封阻外，今場表現最Sharp就要數年輕控衞布魯克斯，佢個人攻入27分並有7次助攻，成為火箭一路奇兵。至於主隊拓荒者僅得萊爾打出水準，貢獻21分，但其餘四位正選嘅得分數字都唔達雙位數。
小牛整體戰挫馬刺
同日較高排名但輸波嘅西岸球隊仲有馬刺，馬刺以97比105不敵小牛。今場馬刺繼續缺少受傷嘅阿根廷孖寶真路比利及奧拔圖，縱然鄧肯及柏加分別交出27及24分，但因小牛整體表現較佳，合共有六人攞得雙位數字得分，最終取得重要嘅作客勝仗。
明日馬刺再於主場迎戰小牛，客隊狀態實在太好，馬刺縱有主場之利，要扳平亦有一定難度。