受壓力影響
為咗讓大家更了解現代女性嘅面貌，我哋找來內地一位女性網站嘅編輯小靜，以佢接觸讀者群嘅多年經驗，等佢嚟詳細解說調查報告同現實嘅關係，小靜話：「調查對象超過六成係在職女性，其餘三成就係學生、農民同埋冇嘢做嘅女性。當中值得注意嘅係，受訪者中六成係在職女性，咁啱有六成受訪者會受壓力影響性生活，而又咁啱六成受訪者性生活得唔到滿足，所以說明在職女性一直承受着極大嘅壓力，因而影響到佢哋日常性行為嘅滿意程度。」
在職女性嘅範圍包括乜嘢階層呢？小靜翻翻手中資料話：「據調查顯示，辦公室女職員就佔26%，專業人士如醫生、律師、教師佔18%，銷售人員有12%，自由職業佔7%，工人有5%，範圍十分廣泛，上中下層工種職業都牽涉得到。」
咁佢哋最大嘅壓力來自邊方面呢？小靜話：「調查中冇進一步分析，但從我哋網站嘅調查所得，在職女性最大嘅壓力係來自同級嘅競爭，由於社會分工細咗，每一個工種嘅專業技能相繼減少，表面工作輕鬆咗，但實際說明冇職位係唔可以取替。」
力戰假想敵
小靜繼續講解：「每個在職嘅女士，都會十分留意身邊可以取代自己嘅對手，視佢哋為假想敵，同佢哋進行競爭，如果對方準時返工，佢就會早幾分鐘返工，人哋準時放工，佢就會遲幾分鐘至走，其他表現都一樣，務求整體表現上比對方優勝。所以佢哋嘅壓力咁大，就係咁嘅原因。假想敵唔知就冇乜問題，但如果畀對方知道，佢哋就會由虛擬競爭，發展成實牙實齒嘅辦公室戰爭，經過一日苦戰，都心力交瘁，返屋企仲邊有時間享受性生活吖！」
咁除咗同級競爭係壓力之外，仲有乜嘢人畀壓力佢哋呢？小靜話：「好多人都以為係老闆，但其實唔係咁啱，應該話係佢哋嘅上司，一般都係指中層管理人員，佢哋喺公司對人處事嘅作風係強定係弱，會為手下嘅職員，帶來唔同程度嘅壓力。如果你上司怕事膽怯，對上級或同級主管都唯唯諾諾，咁佢嘅手下，都會備受歧視；但如果上司表現過於強勢，又會招人討厭，四面受敵，手下就好難融入公司，所以上司好壞，經常會為手下員工帶嚟沉重嘅壓力。」
善用星期日
數落去客人會唔會係其中之一呢？小靜話：「一般嚟講，客人對在職女士帶嚟嘅壓力可以話非常之低，相反如果要數第三位嘅，應該係自己。可能係男女諗嘢嘅方法唔同所致，男士做嘢，一心一意向住目標前進就可以，但女士諗得比較多，瞻前顧後，所以腦力嘅消耗會比男人嘅多，大家都返八小時嘅工，男士返到屋企，仲會龍精虎猛，但女士就會攰到想死，如果男朋友或者丈夫唔識體諒，仲要呢個時候嚟進行性行為，女士們為咗表示深愛對方，都會勉為其難進行，但過程就會完全唔投入，所以大多數性行為都係唔滿意。」
既然明白原因，咁有乜嘢解救嘅方法呢？小靜話：「進行性行為嘅時間可以改變一下，晚上返到屋企攰到死，咪早啲瞓囉！瞓醒天光有氣有力至做，效果自然會更好。另外，都係老生常談，例如要花時間調情，男士多用語言讚美鼓勵，都會有幫助，仲有專家話要多利用周末周日，好好享受假日嘅時間，相信一定可以改善性生活。」
撰文：小德