本文重點
塞爾特人注定衞冕路難行！繼加納特有機會因傷收咧後，「綠衫軍」季後賽首戰亦荊棘滿途，呢支衞冕冠軍本可於第四節解決公牛，可惜皮雅斯完場前兩罰中一，讓球賽進入加時。加時後皮雅斯及雷阿倫先後錯失扳平機會，最終綠軍輸103比105，爆出全日最大冷門。
屋漏兼逢連夜雨，塞爾特人先有「KG」加納特因傷缺陣，及後又有總監安治心臟病發入院，搞到綠軍陣營瀰漫一片灰暗，首戰打得冇神冇氣！成場賽事被公牛壓住嚟打嘅塞爾特人，本可於第四節擊倒對手，皮雅斯喺最後關頭博得諾亞犯規，只要兩個罰球入晒，就可以反先對手一分。可惜呢位射手兩罰中一，兩軍打成97平手進入加時，連運都冇埋。
戴歷羅斯平渣巴紀錄
塞爾特人於加時再一次輸喺自己手上，賽事剩餘11.6秒，綠軍暫停後發動進攻，可惜皮雅斯上籃被諾亞封走，及後雷阿倫最後一擊亦唔中，最終未能為球隊追平，以103比105不敵公牛。
今場打得最好嘅係公牛「狀元爺」戴歷羅斯個人攻入36分，寫下其個人職業生涯新高，同時亦平咗「天勾」渣巴以新秀身份打首場季後賽嘅最高得分紀錄。