政情：梁福元 唔靠政府資源 搞生態園×荔園

引入碰碰車等遊戲

唔少人聽到梁福元同荔園合作，第一句一定會問「荔園？定荔枝園呀？」眾所周知，大棠有機生態園之前個名叫大棠荔枝園，但無花無假，今次真係同荔園合作，現場所見，荔園嘅設施已經開始運入場地。梁福元話，對方主動聯絡佢，初步打算引入碰碰車等機動遊戲，主要因為佢有現成場地，已經改晒土地用途，加上可以停泊約一千部車，依家會營運兩年試吓反應，如果反應好，隨時會再續期，承認公共交通唔夠市區方便，所以都不斷同啲部門爭取道路方便啲。

梁福元一直形容自己「半退休」，佢話依家一半時間擺喺做區議員嘅社區，另一半就搞生態園呢啲開心生意，唔得閒搞政治，政治唔啱佢玩，原來佢最近做咗華南農業大學香港校友會永遠主席，仲話大家以後叫佢做農夫就得o架啦。佢大呻自己唔似得其他大型主題公園有政府資助，只能靠自己，不過近年有機水果生意都唔錯，有機菠蘿賣成一百蚊一個，但轉頭就賣晒，近一兩年仲引入有香印、長青玫瑰等品種嘅提子，產品生意一年都有一千萬元，不過賺到嘅錢都攞晒去營運啦。

生態園到底有咩要營運呢？梁福元話依家有三、四百隻孔雀、超過三百隻羊等有成千隻動物，園內養魚之餘，會收集有魚糞嘅水，用嚟施肥，又會收集動物糞便，搞埋堆肥。

租政府地發展露營

荔枝園幾年前曾被揭發霸佔官地，梁福元最近打算發展露營營地同民宿都特別小心，佢話，營地中間涉及有啲政府地，已經租咗，仲話租金都幾貴吓添。佢又話，生態園今年有約一萬個學生嚟搞迎新，貪呢度係香港罕見有得玩營火嘅場地喎。

雖然梁福元大呻搞生態園只能靠自己，但聽落佢有咁多大計，證明如果搞得好，唔靠政府自由度仲大啦！