中環出更：林健鋒突減持三物業七車位
行政會議係本港最高嘅決策機構，一班行政會議成員時常接觸大大小小嘅政策，自然較一般人更了解本港嘅經濟情況，行會成員點睇後市，自然好值得大家留意一下。身兼行會成員嘅立法會議員林健鋒（Jeffrey）近日申報，減持南區三個住宅物業連七個車位。突然間減持咁多，唔通覺得樓市到頂，自己已經賺夠，所以盡早離場？Jeffrey截稿前未有回覆。
Jeffrey原本申報持有香港及內地多個住宅、工廈、廠房，以及數幅土地，當中有啲係自用、有啲係出租用途，仲有啲寫明係空置。佢上個月底申報，減持本港南區嘅三個住宅物業連七個車位，呢啲物業同車位原本係供親戚使用及出租。呢個咁大嘅變動，唔知會唔會為大家點睇樓市走勢帶來一啲啟示嘞！
羅智光申報改變業權
此外，公務員事務局局長羅智光喺上個月中亦申報，原本同爸爸各佔一半業權嘅一個沙田住宅，轉為由佢佔全部業權，供家庭成員居住。點解會突然改變業權呢？公務員事務局僅回覆話，業權有變更，所以局長相應作申報，冇其他資料補充喇。
卓妮