政情：情人節送驚喜 黎棟國籲男士勿錫住荷包
今日係情人節，相信唔少人士都有計劃為另一半送上驚喜，而保安局前局長黎棟國尋日就千叮萬囑，叫男士唔好錫住荷包，唔通係經驗之談？
陳家珮冀人人有安樂窩
新民黨尋日舉行新春團拜，係黎棟國加盟後首個農曆新年，但佢就掛住情人節多啲，講到明話係一年一次值得紀念嘅日子，所以就叫男士咪錫住荷包囉！不過，佢都有叫女士記得要細心欣賞所收到嘅花，似乎係分享男女相處之道喇！
該黨嘅南區區議員陳家珮舊年底誕下B女，屋企唔夠住而開始留意租賃市場，先發現租金真係好高昂，所以希望新一年人人有安樂窩。而自己今年仲多咗個收身挑戰，事關聽講誕下第二胎後會較難收身，所以講笑話今年唔會祝人珠圓肉潤。
至於立法會議員容海恩（Eunice）仍然放產假而未有出席，但黨主席葉劉淑儀亦冇忘記佢，仲話聽聞Eunice仲未為囡囡改好名喎，葉劉就體貼咁話Eunice有四十二日限期，而且花錢可以再延長限期添！