政情：林健鋒拖老婆遊日 有靚女唔敢𥄫
農曆新年期間立法會休會，身兼行政會議成員嘅立法會議員林健鋒（Jeffrey）就趁休會去咗日本東京旅行，期間仲有「艷遇」添！Jeffrey話，佢當日喺當地一間酒店嘅高級餐廳食飯，隔籬位坐咗個二十多歲嘅女仔，佢大讚對方身材高挑纖瘦樣又靚，不過佢當時就唔敢同對方傾太多偈，只知對方來自緬甸。點解？咪就係因為佢太太同個仔都喺隔籬囉！
Jeffrey話，因為佢同太太係一月結婚，正值農曆新年前後同情人節，所以每年農曆新年佢都會同太太去旅行慶祝，繼去年佢哋結婚四十周年去咗歐遊後，今年佢哋就同埋個仔一齊去東京。太太喺隔籬𥄫住，難怪佢見到靚女，都唔夠膽同人交流喇。
希望豬年個仔成家立室
問到豬年有乜嘢新年願望，佢就好坦白，話希望可以增加家庭成員，被追問係咪想有豬年BB做孫，佢就話新抱都未有，邊有咁快喎。睇嚟佢都好想個仔快啲成家立室，咁囝囝真係要努力喇！