政情：廚餘廠申撥文件零改動 張宇人轟環境局博懵

區詠芷曾拉建制票 不斷碰壁

喺舊年十一月底嘅工務小組會議上，Tommy就工程建議連番提問，鬧爆工程費用昂貴，有錢都唔應該將公帑掉落鹹水海，最終委員會主席盧偉國決定劃線，Tommy即動議中止議程，獲得民主派支持同民記離席抗議，議案獲通過。據悉事後黃錦星曾邀約部分建制派議員飯敍，但未包括Tommy同民記。

事隔兩個月環境局再向委員會遞交建議，主文件係零改動，但就加入大量補充資料解決議員提問。環境局政治助理區詠芷接受查詢時就話，建議已經擺低好耐，唔算快o架喇，而且畀咗好多補充資料回應議員。至於會唔會擔心反彈大？佢就話開會咪知囉。而工務小組尋日開會，消息指前晚區詠芷曾致電部分建制派議員拉票，卻碰一鼻子灰。

陳克勤：垃圾徵費收錢唔公道

舊年底有份拉隊離席嘅民記議員陳克勤話，政府起個廚餘廠淨係處理商業廚餘，但就推垃圾徵費收市民錢，做法唔公道，而當局既然乜都冇改，該黨就會繼續提問，惟局方要承擔之後可能發生「古靈精怪」嘢。

Tommy對當局做法更加係好勞氣，鬧爆環境局處事囂張、好夠膽、有少少病、博懵、離晒大譜，雖然唔係否決都唔應該原封不動提交文件，講明自己唔會被滅聲，「你聲大我都唔細」，如果局方再帶佢遊花園就繼續提中止咁話，強調錢唔係咁使。佢又透露，當局拉票竟然冇搵佢，但搵咗黨友航運交通界議員易志明，易就叫對方氹掂Tommy先。

黃錦星撞過一次板都未識驚，竟然連小小改動都冇，盧偉國又批准再提上會，已引起部分建制派耳語不滿。簡簡單單一個廚餘廠，只要局方做多啲、做好啲，議員又點會有咁多阻撓呢？黃錦星應該反省吓喇！