中環出更：波哥掌財會 翻睇錄像自我檢討
做公職要下苦功o架，政圈普遍認為立法會財務委員會副主席陳振英（Ronick）將會接主席陳健波（波哥）棒，下屆會做主席。六人組尋日搞新春團拜，波哥講起開始傳授「剪布」招數畀Ronick，Ronick就大爆波哥會翻睇自己主持財委會嘅錄影。嘩，真係好似啲演員拍戲睇番自己演成點咁。之後問番波哥，佢話初做主席真係有喺屋企睇錄影，老婆聽到咁嘈望吓佢搞乜，發現原來佢開會咁勞氣。
教陳振英點應付敏感事
Ronick話波哥做財會主席真係好勤力，背晒啲情況要點處理，自己對住嗰本咁厚嘅手冊，就只會標記住邊個情況要點做，遇到某種情況時，就揭去嗰度睇。佢話波哥知道財會即將有啲敏感事出現，會喺兩星期前話定佢知，仲會同佢傾可以點做添！咁佢有心理準備要面對衝擊未呢？佢話依家都係主持過一次會議啫，情況都平靜，佢份人都係比較平靜嘅，波哥就比較上心啲。
佢又話波哥仲有提醒佢開會可能要去廁所，事前要飲少啲水，但佢覺得自己想去廁所就休會十分鐘咁話。
卓妮