中環出更：李豐年嘗百米：每種食物都有作為
大家都聽過神農氏嘗百草，原來現代人賣食品都要隻隻試過先會做得好。有「糧油王子」之稱嘅香港中華出入口商會會董李豐年（Kenneth）早前出席香港中華出入口商會會董就職典禮時講起，佢隻隻米都試過，特別提起七八年前，一次意外，同事攞咗一種米出嚟煲飯，一煲出嚟，冇人食到一啖飯，「直情沙嚟o架，食唔到o架」，佢一問之下，發現原來係「腸粉米」嚟。
Kenneth解釋，靚嘅米又甜又軟，唔使餸齋食飯都得，例如日本有越光米，內地亦有稻花香，至於「腸粉米」就係隔年嘅舊米，如果就咁用嚟煲飯係好難食，但如果用嚟整腸粉就一流，有種煙韌，用新米就會太軟，所以有時見到腸粉垂落嚟，有啲就彈彈吓，大家就知道點解嘞，其實每樣食物都有自己嘅角色，試過先能夠比較出好同唔好呀！
黃玉山陪玩當氹孫
當晚出席嘅仲有香港島各界聯合會理事長蘇長榮、廣西社團總會創會會長譚錦球，當然唔少得新就職嘅中華出入口商會會長林龍安。現場遇到公開大學校長黃玉山，同佢傾開賀年食品，原來佢鍾意食蘿蔔糕等，但全盒入面嘅零食就好少食，因為佢一向好少食零食o架，仲笑指雖然自己食得好少，但都幾肥。佢又講起啲孫都好少食糖，話氹孫唔使用零食，陪佢哋玩就得嘞，仲興致勃勃咁話，最近同小朋友用紙整咗間好靚嘅屋企添！
轉個頭見到中華出入口商會副秘書長楊靜，佢話過年同丈夫一齊請十幾個員工去台灣吃喝玩樂四日，鼓勵吓員工來年更努力，又會順便睇吓當地嘅藝術學吓嘢。嘩，請員工去旅行，真係有心。
卓妮