政情：鍾情貴州文化 余偉傑變專家
中華總商會常務會董余國春嘅兒子余偉傑（Andrew）上月小登科，迎娶葵青區議會前主席方平嘅囡囡Emma，新婚燕爾，Andrew未好好享受家庭生活，即投身工作，呢兩日去咗貴州開會。當Andrew見到着住少數民族服飾嘅工作人員，即上前影相留念，睇嚟佢都幾喜歡當地文化喎。
Andrew笑笑口話真係好鍾意貴州，當地特產豐富，包括苗族銀器首飾、貴州刺繡及藥材等都非常之好，仲有少數民族嘅手工藝品、辣椒醬及聞名中外嘅白酒等，數都數唔晒。佢間家族國貨公司都舉辦過幾次貴州節，將呢啲好嘢帶畀香港市民，今年都部署緊再搞添。
讚發展勢頭好 商機處處
如果要數貴州嘅優點，Andrew話要講好耐先講得完，仲有旅遊資源都好豐富。以前貴州係內地最窮嘅省份，不過近年發展勢頭好好，近幾年嘅經濟增速都喺內地排頭位，所以好值得商界去發掘商機。