政情：同學患流感 施俊輝囡囡提前停課
冬季流感肆虐，兒童更係高危一群，所以幼稚園學生早已經放農曆新年假期，防止流感疫情擴散。而今次流感疫情對教育局局長政治助理施俊輝（Jeff）好貼身，不但與其政策局相關，仲因為其兩歲囡囡都有同班同學中招囉！
開心有得去公園打韆鞦
Jeff嘅囡囡返緊學前班，早喺政府宣布幼稚園提早放假前，已經有同班同學中咗流感，所以囡囡早就無返學幾日，但復課兩日後就公布提早放假。無得返學玩會唔會好失望呢？Jeff就笑指囡囡成日唔想返學，所以提早放假不知幾開心，有時間同住附近嘅親戚去公園玩同打韆鞦，但負責照顧囡囡嘅外父外母、太太就比較辛苦喇。
Jeff仲講到囡囡喺屋企好曳，性格唔似佢同太太喎，但所講嘅係囡囡精力充沛，成日都要走嚟走去啫，仲話小朋友係要定時放電嘅。