政情：葉劉辦年貨 野生捕獲郭富城
尋日係農曆年廿八，大家忙洗邋遢之餘，仲要善用餘下幾日時間，為農曆新年辦年貨同布置屋企。立法會議員葉劉淑儀尋日就喺Facebook分享，早前辦年貨期間野生捕獲影帝郭富城（城城），更大騷二人嘅合照添！
葉劉話早前去灣仔春園街同太原街買年花同賀年裝飾，經過賣裝飾品嘅檔口時，竟然有意外驚喜，就係遇到城城，所以就一齊揀賀年裝飾同傾偈，城城都話係去辦年貨，仲透露自己鍾意紅絨製作嘅紅燈籠同多花樣嘅揮春添。
趁機大講電影經
難得遇到影帝，葉劉仲同城城大講電影經，討論城城上年主演嘅電影，大讚套戲創意十足，葉劉仲講得出電影情節，證明真係有入場支持香港電影。葉劉其後更把握機會，恭喜城城即將再做爸爸，估唔到葉劉對娛樂新聞都咁緊貼喎。