政情：立會換屆 傳陳凱欣返熱廚房 蔣麗芸可留低?
正所謂「一山不能藏二虎」，立法會九龍西選區在去年兩場補選後，六個議席當中四個都被建制派包攬，面對人滿之患，該區到二○二○年換屆選舉，建制派必定有人冇得留低。有建制派中人分析，如果去年十一月補選勝出嘅食物及衞生局前政治助理陳凱欣角逐連任，該區年紀較大嘅建制派議員蔣麗芸（Ann）就最大機會要離開議會。不過，近日就有傳陳有意重返政府出任副局長，如果係咁就能各取所需喇。
現時立法會九龍西四名建制派議員包括陳凱欣、經民聯梁美芬及兩名同屬民建聯（民記）嘅議員Ann同鄭泳舜（Vincent）。有建制派中人就話，去年九龍西補選，建制派支持陳參選，就係希望可以取得民記同梁所屬嘅經民聯兩大建制派政黨支持者以外嘅選民支持，以博取明年立法會換屆時，建制派可取得三席。惟現時該區已有四名建制派議員，意味四個之中必定有一人會被「飛走」。
倘陳轉戰九東 牽連謝偉俊
由於民記已經有兩席，被視為民記九龍西接班人嘅Vincent只做咗一屆，Ann似乎就係最大機會冇得留低嗰個。有建制派中人就提議，如果陳凱欣轉戰九龍東選區，九龍東現時身兼灣仔區議員嘅獨立建制派議員謝偉俊就轉戰俗稱「超級區議會」嘅區議會（第二）功能界別議席，咁樣Ann就唔使退落嚟喇。
Paul回覆時承認，如無意外都希望可以連任到區議員一職，但被問到係咪為轉戰「超級區議會」鋪路，佢就話未有諗法，坦言一六年立法會換屆選舉時都有傳過佢轉戰「超級區議會」，但「冇得諗就冇得轉」，所以都傾向繼續留喺九龍東打拚。
陳凱欣：目前做好九西工作
咁講法，陳凱欣轉區不成，唔通Ann注定從此立法會止步？最近就有傳陳凱欣其實志不在立法會，而係想重返政府兼更上一層樓擔任副局長。而喺一七年政府換屆時，已有指陳有此諗法，只係當時有人認為佢唔夠班，所以作罷。依家陳順利成為議員，或會為其重返官場加番啲分。陳凱欣回應話，未來兩年會做好九龍西地區工作，目前對二○年立法會換屆同二二年政府換屆均冇任何計劃，又強調至今冇人同佢傾過二○年換屆選舉轉區或二二年重返政府嘅事。
雖然Ann早前曾明言民記喺明年立法會換屆會爭取派兩條隊伍參選，而佢亦自言有心有力，寸爆啲後輩負累多，面對錯嘅嘢都唔夠膽出聲批評，但最終有冇得留低，都要睇吓佢仲有幾大政治能量，同埋睇吓陳凱欣何去何從喇。