中環出更：插政府唔識派錢 柯仔派福袋惠長者基層
政府本月起開始接受申請關愛共享基金四千蚊，但申請手續繁複，劣評如潮，市民同地區人士都怨聲載道。立法會議員柯創盛（柯仔）早前已經怒插派錢派到亂晒龍，為幫街坊印申請表，連影印機都壞埋，佢就身體力行話政府唔識派錢就由佢嚟搞，好似早前就喺九龍東大派福袋畀長者同基層，實行自己做好過喇。
涼薄官員激嬲老友記
不過，柯仔話自己財力有限，但勝在誠意搭夠，所以花咗差唔多一個月時間派出三萬五千個福袋，多過三萬個家庭受惠，而且呢個活動並非一次性，而係已經維持咗十二年咁耐。柯仔話，有唔少長者都關心自身權益，希望政府唔好咁涼薄，佢仲應承班長者，幫佢哋爭取應有權益。至於今次派嘅福袋即使未必為長者帶來即時重大改變，但都希望令長者感受到溫暖咁話。
其實長者有咁嘅睇法原因顯而易見喇，就係政府早前突然收緊長者綜援申請門檻，由六十歲提高到六十五歲，官員期間仲要死撐同火上加油大講風涼話，最終咪搞到社會反彈極大，連本身安享晚年嘅長者都嬲埋一份囉。
卓妮