中環出更：逆市擴充 孫秉樞為錶業打氣
本港旅客人數全面回升兼屢創新高，但係高消費零售業並無得益，事關中美貿易戰仍未明朗，不過逆市擴張則大有人在。有「鐘錶大王」之稱嘅香港鐘表業總會（總會）永遠名譽會長孫秉樞，早前就趁新春吉日宣布取得某瑞士錶授權，推出針對年輕人嘅新系列時尚腕錶，盼為錶業打支強心針。
孫秉樞的細仔孫大豪及新抱杜苑貞都在場，卓妮見現場展示多幅杜苑貞嘅抽象畫，原來今次腕錶系列嘅錶背採用咗佢嘅五幅畫作，咁有眼光嘅唔係佢老公，而係同孫家拍住做生意三十幾年嘅總會顧問周建榮。佢話好欣賞杜嘅畫作，夠晒色彩繽紛，正正符合呢個源於法國品牌嘅華麗浪漫形象。至於唔放錶面而係放錶背，唔係因為要扮低調，而係怕太花。
梁兆權梁青華互叫「大佬」
當日錶界猛人群集，包括新加坡鐘表業公會副會長梁兆權及兒子梁興銓、總會新任主席李永安及多名顧問包括梁青華、黃麗嫦及區宇凡等人。梁兆權同本港業界關係好好，一見到梁青華仲互相叫「大佬」，兩人驟眼望落去有幾分相似，唔通真係有親戚關係？華哥就笑笑口話，只係同姓三分親啫！
剛剛上任嘅李永安展望今年市道時話，雖然個人遊嘅人流多咗，但係平均消費金額低，令高消費零售市場受到比較大嘅影響，希望人民幣匯率升番啲、經濟好啲，咁就可能會有曙光，始終大家搵到錢就自然會使多啲。
卓妮