政情：派錢混亂 波叔直認抵鬧 網民大派嬲嬲
政府派四千蚊嘅關愛共享計劃籌備咗近年，但係安排極度混亂，包括申請表格唔夠派、電話熱線冧晒檔、手續繁複等，搞到全城鬧爆。財政司司長陳茂波（波叔）尋日孖住藝人王祖藍喺Facebook開直播，諗住可以收集市民有關《財政預算案》嘅意見。點知收意見就變成收「嬲嬲」，成個直播短短一個鐘就有過千個嬲，佔咗九成，幾乎大部人都係鬧派錢。波叔就同市民公開致歉，直認自己「真係抵鬧」，話會汲取今次教訓喎。
上年嘅《財政預算案》喺公布初期被炮轟派糖不均，政府最終跪低，推出四千蚊補鑊。點知上星期一開始派表之後，一再跪低，多次更新申請方法同埋措施，最新就係由今（28日）起，將三十四條電話熱線增至六十條。
大批網民喺直播期間鬧爆派錢措施，話係擾民、手續好麻煩，仲有人話「一係就企硬唔好派，派就唔該爽手少少，搞咁多花款，不倫不類，派錢都可以派到激起民憤，財爺可說前無古人」。另外，亦有網民話依家香港嘅租金、物價等等乜都貴，認為四千蚊幫唔到啲乜。
「當係利是仔」 刺激市民神經
波叔不停話「唔好意思」，仲解釋話自己都想早啲派錢，但「關愛共享計劃」唔係當局一直做開，所以要額外請人做電腦系統，再加上要收集一定嘅資料數據，政府需要有一定嘅採購程序同埋做好網絡保安，所以先覺得呢個安排會好啲。之不過，當回應有市民話派四千蚊唔夠時，佢竟然話：「真係唔好意思，你當呢封係利是仔啦」！呢句說話又再刺激市民神經，大拿拿四千蚊，仲話係「利是仔」，唔知波叔平時點封利是呢？
講到派糖 又玩期望管理
波叔又辯解話，政府嘅理財新哲學係有針對性，唔適合全民派錢，今次派四千元就派咗一百一十億元，如果全民派錢就要使二百至三百億元，一百億其實已可用嚟起一間兒童醫院。被問到全民免電費嘅問題，佢就話同環境局傾過，覺得咁做唔夠環保喎。一講起派糖，波叔就係咁搵藉口，睇嚟似乎又係玩「期望管理」，叫市民唔好諗太多啦！