中環出更：曾國衞唔鍾意比賽跑步 只試過一次
香港人愈來愈熱衷於做運動，坊間即掀起一陣「跑風」。入境處處長曾國衞尋日出席保良局慈善跑時，就話自己十幾歲已經係「跑友」，但幾十年嚟只係參加過一次比賽，皆因只係鍾意玩，唔喜歡競賽覺得有壓力喎！
曾國衞話，人生唯一嘅一場比賽，就係臨出學堂前賽跑，得到第一名，平時主要玩吓跑步機。佢又話近年好多人參加跑步比賽，臨尾先喪跑好危險，覺得唔好「夾硬衝」，否則好易受傷。佢坦言做運動未必可以延長壽命，但必可改善生活質素。
同場仲有海關關長鄧以海及懲教署署長胡英明，鄧以海就嘆公務忙，無乜時間做運動，有時候想鬆一鬆，就會喺辦公室入面拉拉筋，醒醒神！問到咁忙點令自己精神？佢笑話返工就有動力，Keep住做嘢就唔攰o架喇。
顧東華父子兵上陣
保良局總理湯振傑係退役劍擊運動員，佢都贊成多做運動，退役後都會間中跑步同健身以保持體力，不過自己「身重」，最多跑十公里。佢又話，做運動時最緊要識得點樣跌倒，要習慣用屁股落地，否則一用手撐就好易受傷喇！
總理顧東華就父子兵上陣，佢話個囝玩三項鐵人後，佢先開始有規律咁做運動。佢憶述曾經參加馬拉松「全馬」比賽，第一次喺西隧口差五百米左右就跑唔上去，被大會落閘要求坐上巴士走。佢唔忿氣，再參加一次就成功，所以話做人真係唔可以夾硬嚟，要量力而為先得。
卓妮