政情：鄭明明為長者義剪 重操舊業仍熟手

農曆新年臨近，有「美容教母」之稱嘅國際斯佳美容協會創會主席鄭明明（明明姐），尋日帶埋一班協會委員落區為長者免費剪髮，又送幾百套洗頭水、護手霜兼派利是，好有心。明明姐將啲相擺上社交媒體，仲上載一段佢親自操鉸剪為長者剪髮嘅短片，留言話自己係重操五十三年前嘅老本行。見佢刀法十分利落，認真係寶刀未老。立法會議員蔣麗芸都喺現場，佢都有份幫長者飛髮。