政情：鄭若驊上任四日有人送鐘 預示敲響司法警鐘
問責官員出席公開場合時，收到嘅禮物寓意可能都好深遠。本報翻查二○一八年問責官員收到嘅禮物，部分十二月紀錄或不齊全嘅情況下，發現唔少高官都收到同自己政策局有關嘅禮物，好似環境局局長黃錦星收到生態米、創新及科技局局長楊偉雄收到自製VR耳機、民政事務局局長劉江華收到摔角服裝咁。最令人留意嘅係，因「放生黎智英、唔告梁振英」而被全城鬧爆嘅律政司司長鄭若驊，上任第四日即刻有人送鐘，睇番佢最近嘅表現，真係令人覺得響起司法警鐘，唔知邊個咁有先見之明呢？
鄭若驊去年一共收到八十份禮物，係收禮數目第二多嘅問責官員，禮物包括兩罐茶葉、一件披肩及一匹布等。佢去年一月六日上任，九日就收到一個座枱時鐘，唔止大吉利是，亦惹起唔少聯想。
此外，佢同食物及衞生局局長陳肇始都申報收到酒，陳肇始申報寫明係氈酒，但鄭若驊嘅申報就冇寫明係咩酒，不過兩人都冇保留啲酒，唔知係咪前廉政專員湯顯明收烈酒嘅前車之鑑不遠，唔敢留住呢？
陳茂波收禮最多 逾200份
收禮數目最多嘅係財政司司長陳茂波，共有逾二百份禮物，包括哨子、翻譯機同埋七塊紀念肥皂，佢仲保留咗其中四塊添！至於政務司司長張建宗（小肥張）就收到六十六份禮物，包括椰棗、對聯同埋領呔，見到領呔令人不期然諗起小肥張嘅金句，話佢好鍾意返工，一有得打呔就興奮，呢位送禮人真係好有心思喇。不過小肥張冇保留啲呔，可能因為已有太多嘞啩？
教育局局長楊潤雄都收到唔少禮物，共六十七份，係局長之中最多嘅，包括兩樽健康膠囊及七隻小熊公仔等，佢就留起咗五份禮物。環境局局長黃錦星每年都收到好特別嘅禮物，去年就有兩個白蘿蔔、一小包生態米、拖把同埋手作大嘥鬼。至於民政事務局局長劉江華就收到一套摔角服裝及一個獎牌。
財經事務及庫務局局長劉怡翔收到最少禮物，其中有八個月時間連一份禮物都冇，唔知係同佢少出席活動，定係出席活動前已婉拒接收任何禮物有關呢？其實如果各司局長事先話畀人聽唔收禮，就唔使嘥咁多精神去申報或善後喇！