中環出更：葉恩明大讚傷健人士 煮飯叻過議員

葉恩明做咗傷健共融工作幾十年，佢話能夠見到社會減少歧視真係唔容易，近年不時會搞「老友同行」活動，讓智障人士同立法會議員一齊煮飯仔，佢哋煮飯有板有眼，甚至叻過部分議員。雖然智力低啲，但有高尚情操，十分善良，希望社會可以畀更多關愛佢哋。

肥老闆減肚靠「行」

有番咁上下噸位嘅金融服務界立法會議員張華峰（肥老闆）都有出席，仲好難得帶埋太太及女兒同行，卓妮見佢最近好似有番少少腰形，唔知有咩減肥絕技呢？肥老闆就笑稱係一字記之曰：「行！」問到平時有冇做開運動，佢即刻「騷肚」反問：「你唔覺我瘦咗咩？」

咁係咪太太逼減肥㗎？肥老闆唔敢講，即刻望向遠處話：「唔好亂講啊！」張太則坦言無逼佢，只係醫生都叫肥老闆要郁動吓，所以夜晚食飽飯會一齊散步，平時又出街行吓，但大呻老公起初行一陣就話攰，成日搵藉口坐低飲咖啡，好彩依家都有啲成效咋。

張華峰（中）帶埋太太（左）同女兒（右）出席活動。

施家殷試玩草地滾球。

另外，扶康會主席施家殷即場試玩草地滾球，可惜頭兩次滾個紅波出去，連白波都掂唔到，佢就尷尬笑稱自己太溫柔。問到新年去邊玩？佢就話大女去咗英國，太太喺食完團年飯後都會飛過去，所以今年都係喺屋企休息吓喎。

卓妮