流感高峰期，縱使醫院管理局已喺各間公立醫院加咗病床應付，但仍然逼爆。立法會衞生服務界議員李國麟尋日鬧爆加床唔加人手，令到護士工作量大增，有護士組織更計劃去政府總部請願，反映前線護士嘅工作苦況添！老實講，每年流感高峰期，醫院都倒瀉籮蟹咁，鬧極都冇改善，皆因公立醫院十個茶煲兩個蓋，長期都紓緩唔到，唔通做過護士嘅食物及衞生局局長陳肇始唔知，抑或係冇眼屎乾淨盲呀？
