政情：收料站：逾半議員唔撐 三隧分流凍過水
政府將於下周三喺立法會會議上提出「三隧分流」無約束力議案，調整三條過海隧道嘅費用，以紓緩過海車龍。然而，社區對方案普遍有保留，連建制派政黨亦一樣，預料議案難以獲在席過半數議員支持而獲得通過。
陳恒鑌將提隧道費修訂
現屆立法會中建制派佔三分之二，當中民建聯手握十三票。屬民建聯嘅立法會交通事務委員會主席陳恒鑌話，由政府最初提出「三隧分流」方案時已有好大保留，即使政府多次派員進行游說同交流，仍未能釋除地區人士嘅疑慮，而且對即將啟用嘅中環灣仔繞道，疏導西隧車龍嘅成效亦有所保留，擔心屆時會由「三隧分流」變成「三隧齊塞」，所以未能同意政府嘅議案。
佢又話將會提出修訂，以表達對目前方案嘅關注同憂慮，修訂主要針對現時方案加幅過高問題，亦希望巴士喺豁免隧道費後可作出減價，冀政府能接納該黨意見。佢重申，對政府嘅原議案有好大保留，進行中嘅問卷亦反映地區人士同樣有保留，故現時無辦法支持原議案。
手持五票嘅工聯會尋日就同特首辦會面，議員陸頌雄認為方案加幅過高，擔心會得不償失，佢認為屆時或會有唔同投票取向嘅可能，但投贊成票就「好難」。