政情：憤退籌委會 李華明寸乳鴿吸金力弱
民主黨（白鴿黨）每年都舉辦籌款晚宴，該黨中委會日前決定今年唔邀請特首林鄭月娥出席。據了解該決定掀起黨內「老鴿」同「乳鴿」內訌，而黨內「吸金王」、立法會前議員李華明（Fred）更憤而退出籌款委員會。阿Fred亦毫不畏言寸爆話老鴿吸金勁過班乳鴿喎。
籌款宴請嘉賓爆內訌
回帶返舊年，白鴿黨請咗林鄭出席籌款晚宴，當晚林鄭仲當場認捐咗三萬蚊贊助阿Fred獻唱。但今年籌款委員會甫開始籌備晚宴，請唔請林鄭就成為黨內老鴿同乳鴿嘅角力戰，據悉老鴿就覺得以往只係叫邊個下台就唔請邊個，依家又冇叫林鄭下台，冇理由唔請佢；乳鴿就覺得政府控告該黨立法會議員尹兆堅同林卓廷，冇理由請佢，但最終中委會一錘定音決定唔請。
阿Fred回覆時話中委會同籌委會共識唔請叫下台嘅官，冇叫林鄭下台都唔請，咁明年仲請唔請？覺得好似改咗準則所以退出籌委會，又坦言晚宴係社交場合唔使搞到太政治。問到作為黨內「吸金王」會唔會繼續幫手籌款？佢就笑稱，只係主力之一，唔係唯一，但明言「老鴿籌款能力遠遠高過乳鴿」，目前答應會幫忙籌嘅會繼續做，將來就唔諗嘞！