政情：做過救生員 譚文豪批培訓不足
舊年九月有救生員在荃灣汀九近水灣泳灘落海檢查防鯊網時，懷疑遇溺不治。有立法會議員就救生員潛水訓練事宜尋日立法會大會提出質詢，期間議員譚文豪（Jeremy）就自爆曾經做過救生員，批評當局提供畀救生員嘅培訓「好有問題」，特別係沙灘救生員嘅訓練不足。
謝偉俊幫口質問當局
Jeremy話當年雖然只係做泳池救生員，但就覺得沙灘救生員訓練唔夠，唔係個個都有進行水肺訓練，認為當局應該要求所有沙灘救生員都應該要有相關訓練。
曾因Jeremy重提其着泳褲抗議律師會一事而向Jeremy開火嘅議員謝偉俊（Paul），今次似乎亦都認同Jeremy講法，話依家有近二千名救生員，部分漸漸老緊，唔少救生員日常工作多數係坐喺度觀察，質疑「譚文豪議員keep得好」，但係咪個個都係keep得咁好呢。佢仲質問當局係咪有定期測試救生員體能。
民政事務局局長劉江華回應，康樂及文化事務署有測試畀救生員，以確保佢哋體能符合標準，並將會加強有關工作咁話。Jeremy同Paul多次喺立法會大會上針鋒相對，佢哋今次冇嗌交，真係難得喇！