中環出更：寸爆政府 提早離席 建制派無聲抗議
特首林鄭月娥嘅「議員批准論」餘波未了，殃及綑綁逾萬個工程嘅基本工程儲備基金整體撥款。立法會工務小組委員會尋日朝八點半開會，建制派四大政黨喺十點前已全部走人，過程中更只有民建聯（民記）三名議員提問齊寸爆政府。好彩民主派冇提中止或其他動議，否則喺建制派「冷待」下，相信任何動議都輕易通過。
首位發言嘅陳恒鑌話，撥款當中有中環同其鄰近地區電子道路收費先導計劃嘅可行性研究，但電子道路收費仲諮詢緊，未知做唔做，點解會有呢項研究？如果批咗撥款，係咪代表支持電子道路收費呢？
審批撥款官員勢「罰坐」
陳克勤就話記得工務小組早前已中止咗「發展有機資源回收中心第二期」嘅主體工程，反問點解今次撥款入面有呢項工程嘅可行性研究，既然已中止咗項目，議會未批准局方攞番上嚟前，應該相關嘅錢都唔應該使。
老實講，民主派覺得基本工程儲備基金整體撥款「魔鬼在細節」，早幾年經常拉布怒問，有建制派護航先獲通過。今次建制派無聲抗議，相信撥款無咁順利可以通過，官員勢有排「罰坐」。
卓妮